宜蘭~花蓮~台東(三仙台)~台中(武陵農場)

DAY 1 - DAY 2

香港 - 台北 - 宜蘭 - 花蓮

响2011年2月尾有幾日假，又超級想去旅行，所以今次粒粒玲子用咗一個星期既時間搜集資料、換機票、訂車、訂民宿，就去咗從未去過既宜蘭+花蓮。由桃園到宜蘭大約須兩個鐘車程，短暫停留宜蘭就去花蓮，途經三芝鄉大湘路(淡水上少少)睇櫻花，可惜櫻花已經無晒了，再過少少到咗石門鄉，差不多係台灣最北點........係無咩特別既。由石門再揸2個鐘頭車落宜蘭，粒粒玲子選擇咗係礁溪鄉住，可以浸溫泉，又可去羅東夜市掃街。

第二日經三星鄉去武陵農場，咁啱經過各大傳媒強力推薦既三星何家蔥餡餅，因為三星鄉最出名就係蔥，淨係假日先有得賣，何家蔥餡餅好狠架，佢地係用一個權頭咁多既蔥包落個粉餅度，啲人都買得好狠，玲子前面只係排咗3個人，但佢地買咗35個.........

三星鄉三星路八段2號 +886 932 292 584

去武陵農場途中聽到收音機話農場塞車到呼籲公衆唔好去，唉.......粒粒話咁多人去到都影唔倒相，就立即改行程由蘇花公路落花蓮。蘇花公路一路行一路都有標示到小心落石，見到都有啲驚驚地，不過一見到海+sunshine就咩都唔記得喇 !

到花蓮不妨去太魯閣國家公園遊遊，進入太魯閣果一刻，玲子聯想起風雲呢套戲，兩旁都係高高既峭壁，彷彿見到風師兄係度練武咁，不過太魯閣同蘇花公路一樣有好多落石，某啲路段當局會要求遊人帶上安全帽，從相可以睇到之前既落石佢地無清理，比遊人繞道而行。

時間唔早喇~係時候返羊角村，一間好舒服既民宿羊角村 ~ 位於花蓮縣壽豐鄉鹽寮村福德51號，近遠雄海洋公園。

http://www.giethoorn.com.tw/giethoorn.html 留言區詢問後匯訂金，當日粒粒玲子訂第一天27/2假日價浪漫房NT$3500 + 第二天 28/2平日浪漫房NT$2800

羊角村最正既係間間房都對正東面，粒粒玲子只要係張床度擘大雙眼就可以睇度咁靚既日出。

DAY 3 - DAY 4

台東三仙台 - 台中武陵農場

由羊角村要揸兩個鐘頭車先到三仙台，感覺有D遠，但都值得，因為全程沿海岸線，真叫人心曠神怡。記得每次到台灣機場，都會見到有好多台灣名勝廣告相片，其中一幅就係三仙台呢。入到去都有好多野食，如係時令季節，有燒飛魚食喔。

三仙台附近你成功鎮，成功鎮路邊有好多花海，睇吓你好唔好彩遇到喇。回程之後就返去花蓮市Dinner 及買手信。

​

最後一日，終於去武陵農場。武陵農場，以春之花海、夏之果蔬、秋之楓紅、冬之瑞雪命名 ~ 係未到武陵之前，途中見到展露北國風情既合歡山啊。粒粒玲子去武陵既原因，係因園區內有大片 櫻花、梅花等果樹，剛好3月頭重係梅花、櫻花盛開既季節，雖然武陵農場需要收費，但價錢並不貴，入面有酒店賓館OR露營區，登上雪霸登山區入口都响武陵農場。

http://www2.wuling-farm.com.tw/room/index.php