廣島~大久野島~宮島

DAY 1 - DAY2

香港 - 東京 - 廣島 - 大久野島 (Okunoshima / Rabbit island)

點解要先去東京，再飛去廣島? 因為一星期只有二日直航機去廣島，自然會好FULL啦，不過幸好以上轉機都係只需30,000里啫。每次去東京，粒粒玲子都盡量選擇羽田機場，點解？因為到市區車費較平，旅客較少。但主要原因係羽田機場既內陸線好多野睇，又多本土手信買，係咪睇見都覺得好食呢今次旅程可以無須自鴐，但為了方便行李運載，車程時間更易掌握，最終決定自駕，當然係搵番TOYOTA啦。

​

去到廣島機場，攞埋車已經下午3點，所以澎澎聲即刻去大久野島啦。去忠海可以選搭火車，如自駕遊就泊車响碼頭旁泊車處，但切記不耍亂泊造成阻礙。

GPS定位電話0846260853

有船期表可作參考，而去得大久野島當然要帶手信俾兔仔啦，有D人會帶菜，為了方便，忠海港有兔糧賣，呢間士多小店有兔糧賣，位置在售船票處旁，但其實售船票處亦有兔糧賣，價錢一樣視乎你自己喜歡，而島內有酒店，為免入到去賣晒，所以入島前買定。

去大久野島要注意係有分1,2號橋上落船，如好似粒粒玲子咁搭尾班船既就要去1號橋，而1,2號橋距離10分鐘路程。落船之後，向休暇村方向進發，因為最多兔仔就响果度，沿途都會有好多兔仔歡迎你，一有人行近就會奔跑過來。

​

不過咁多兔仔當中都會有D有受傷或病，但大部分都係健康既。去到休暇村，會有一大塊草地，近海。

响呢度踩單車亦是賞心樂事既節目，不過要小心"兔出沒注意"，能夠引到幾多兔仔就要睇你有幾多手信喇，哈哈，再加上當天係平日&黃昏，人不多，咁自然可以集中到更多兔仔啦。粒粒好鐘意呢張相，因為好有Discovery Channel feel，幫玲子用大機影緊相之際，突然有兔仔騷擾，於是取出手機整番張Selfie先。

​

呢個好好味蛋卷專誠响羽田機場買去野餐睇日落食既，不過小心兔仔偷食喔，粒粒玲子選擇睇埋日落搭尾班船離開兔仔島。

走時發現紙袋都被兔仔咬爛。

DAY 3 - DAY 5

宮島 Miyajima - 崗山 (三井Outlet) - 廣島市

今早要响中午12點前到達宮島，點解? 睇埋下面就知，黎宮島口可以搭JR，自駕遊就可泊附近停車場。

GPS定位電話0829560555

宮島口有2款船提供，班次亦好頻密，如無記錯右手JR船會駛近大鳥居，可讓你近距離欣賞大烏居。今晚會住响宮島，圖中左手邊最高單棟式旅館

今晚會住响宮島，圖中左手邊最高單棟式旅館。一落船就見到可愛小鹿迎接旅客，當然要同小鹿整張Selfie先啦。

島上都有起碼二,三十隻鹿，但島上有告示提醒遊客不要餵飼小鹿，與奈良完全不同。要趕在中午12點到宮島，原因係退潮，可以近距離睇大鳥居。趕完退潮睇大烏居，就响市集遊吓可以慢遊買吓心怡手信。

​

又到咗食午餐醫肚既時候，廣島最出名食咩？其中一樣梗係廣島燒啦，仲有就梗係食廣島牡蠣(蠔)，呢個午餐不算貴味道又對辦。午餐完畢，就去Check in啦，以宮島一間海景房只需$1100港幣左右算抵住喇。

Check in 後粒粒玲子就慢遊宮島。宮島街道和山邊古道上還可感受到舊商家古屋及懷舊風情。宮島內好多商店，亦有唔少cafe，可以一邊品嚐咖啡之餘，感受吓咁優美既風景。

​

嚴島神社係被世界文化遺產登錄在冊的神社，有１４００年以上的歷史。收入場費，但好平啫，點都要入去遊吓，當水漲時神社會彷彿在水上，亦是被喻為建立在海上的神社。唔好以為無人，係因為當天是平日，加上接近關門時段。

基本上呢張相响一般時間係唔會影到呢個效果，因為會有好夕旅客爭相搶呢個位，加上水漲，大烏居下面無人，再者等到關門前既時段，先至可以正面感受日本三景之一。咪以為好夜，剛剛係夜晚7點，旅館老闆仲同我地講食店一般關門係8至9點，但粒粒玲子發現全街只得番3,4間食店，所以嘭嘭聲食dinner。

呢款炸牡蠣都唔錯，不過呢款鰻魚飯有驚喜，相信係來自烤法及醬汁，食落脆皮，再鬆軟，醬汁與別不同，原來亦係宮島3大美食之一。廣島牡蠣旺季係約11月至4月，食落口感滑爽、肥美多汁，真係堅好食，不愧係宮島3大美食之一。

Dinner完畢，就去咗睇大烏居夜景及品嚐甜品，宮島3大美食之一紅葉蛋糕，不過粒粒玲子就覺得一般，唔啱口味。粒粒玲子黎到宮島有一件唔開心既事，就係見到鹿群不可餵飼，與奈良既差別好大，只見牠們不停找食，再查証一下為何不可餵食鹿群，得知島上為了控制、減少鹿群數量，當地政府在2008年通過一條法令，決議完全禁止餵食鹿群。當地官員認為，如果讓鹿群回到自然狀態（不再依靠餵食），就能使牠們回到野外、降低數量‧‧‧但很易見到鹿群其實已被馴化，隨意地在街上遊走，不怕人類，相信很難返回自然狀態，網上資料還記載宮島鹿群現在轉向倚靠「垃圾」維生，粒粒玲子頓時記起有小鹿在沙灘不停咬膠袋‧‧‧那一刻從房間望向街上找食物既鹿群感覺得好心酸，很想落街買食物餵一餵佢地，奈何根本無飼料可以買到，此時亦想起商店街一D店鋪關門後外面有一堆類似狗糧物體，相信都是店主不忍心見到呢個情

第二朝離開宮島之際，見到呢檔牡蠣包好多人排隊，所以都買一個試吓在船上品嚐。好食架，外脆內軟，配日式咖哩＋牡蠣，400Yen。

​

去完大久野島及宮島之後，無咩地方想去，於是自駕2小時去咗岡山三井OUTLET PARK　shopping一番。三井Outlet出面都好舒服，有一片大草地。

〒710-0813 岡山県倉敷市寿町12-3

GPS定位電話0438386100

行完Outlet之後就返去廣島市，廣島市都有三越SOGO，不過粒粒玲子對廣島市Aeon Mall有興趣多D。

​